يوم في حياتي 🤍

في بداية اليوم كنت اعاني من مشاعر سلبية لكن الحمدلله مع الوقت بديت اتحسن واستمر بتحقيق اهدافي، المهم اليوم بقولكم وش سويت بيومي وكذا ف بدون ما اطول عليكم لتسقوو 🥳

كان عندي هدفين اساسيين هما اول حاجة اقرا كتاب الاسبوع وبالمناسبة اسمه كتاب افكار لحياتك حلو ورهيب ساعدني احسن بنفسي اشياء كثير بالرغم من اني ما انهيته للحين 🙂‍↔️

المهم بعد ما انهيت قراءة الكتاب اخذت بريك ورحت اشوف مباراة الهلال والنصر، بالبداية زعلت لان النصر سجل هدف بس انتهت وانا مبسوط جدا بالثلاثية ( الهلال ابدا ما خذلني ودائما يفوز ) عشقي لنادي الهلال ابدي 💙

بعد ما انتهى البريك خرجت برا البيت امشي شوي واغير جو، برضو كتبت خططي لبكرة منها اطلع مع اهلي ونغير جو سوا ونستانس

المهم انتهى البريك رحت اشوف بودكاست ياسر الحزيمي وانا اساسا شايفه قبل فترة بس قلت لنفسي ليش لا يمكن استفيد اكثر لان فيه معلومات جدا مفيدة

وشفته للنص لانه حرفيا طويل ساعتين تقريبا. وخلال ساعة وحده استفدت كثير وقررت اوقف واكمله بكرة لاني مستمتع حرفيا بكل دقيقة.

وبكذا تقريبا يكون انتهى يومي، الحين الساعة ١٢ بالليل راح انام واصحى بكرة الساعة وحدة الظهر لان فيه رحلة مع اهلي

هذا كان ملخص لاحداث يومي ان شاء الله تستمتعون فيه، واشوفكم بعدين في اقرب فرصة اسولف فيها معكم وابثركم، الى اللقاء 🤍